Tito Stagno, nàsciu in Casteddu in su 1930, est istétiu unu de is giornalistas e ghiadoris televisivus italianus prus connotus. In su 1954 at bintu su primu cuncursu natzionali po telecronistas e s’annu agoa at cumentzau a trabballai in su primu telegiornali italianu, ghiau de Vittóriu Veltroni.

 

Sa vida sua de telecronista cumentzat in su ’56 cun is giogus olìmpicus de ierru de Cortina, s’annu a pusti Stagno contat sa frima de is acórdius de su Mec (Mercau Comunu Europeu, sa moderna Unioni Europea). Sighit sa carriera sua contendu is abbìsitas de cabus de istadu e reis in Italia, e coment’’e imbiau de duus pabas – Giuanni XXIII e Paulu VI – e de duus presidentis de sa Repùbbrica: Segni e Saragat. In su ’61 de sa boxi sua is ispetadoris iscurtant s’aventura ispatziali de Gagarin, chi po sa primu borta bolat a giru de sa terra. Ma sa cosa chi dd’at donau fama prus manna est sa telecronaca de su primu allunaggiu: su 20 de mes’’e orgiolas de su ’69, corant’annus fait.

 

“Ha toccato, ha toccato il suolo lunare. Signori sono le 22.17 in Italia, le 15.17 a Houston, le 14.17 a New York, per la prima volta un veicolo pilotato dall’uomo ha toccato un altro corpo celeste. Questo è frutto dell’intelligenza, del lavoro, della preparazione scentifica e della fede dell’uomo. A voi Houston…”. Cun custus fueddus Tito Stagno at sinnalau su momentu de s’isbarcu in sa luna. A custu puntu, tra s’imbiau de Houston Ruggero Orlando e Tito Stagno c’est un’iscàmbiu de batutas poita po Orlando s’allunaggiu si verificat calencunu segundu apusti: “Qui ci apre che manchino ancora 10 metri…”. In-d-ogna modu aplàusus e errisus isminguant sa tensioni chi un’eventu de aici importanti produsit in totu s’opinioni pùbbrica e de sa cali sunfrint is giornalistas puru.

 

Sa carriera de Tito Stagno sighit in sa Domenica Sportiva, chi su giornalista curat po 17 annus e ghiat in duas ocasionis: de su ’79 a s’’81 e in s’’85-’86. Andau in pensioni iscrit ancora in calencunu giornali (L’Eco di Bergamo,La Gazzetta di Parma), s’incrarat dónnia tanti in televisioni, coment’’e òspiti, mòderat dibàtitus e fait letzionis de giornalismu in is universidadis. Coiau cun sa giornalista Edda Lavezzini tenit duas fillas: Brigida (dotori) e Caterina (giornalista issa puru). Is nòminis si ddus at postus cunsillau de su paba Roncalli, po nanca torrai gràtzias a duas santas chi ant fatu meda po nci torrai sa Sedi Santa de Avignone a Roma.