Dr. Drer e Crc Posse, arrepadoris de Casteddu, faint unu rap-ragga amesturau cun sonus de sa traditzioni sarda e de dónnia parti de su mundu. Cuatru boxis in su palcu. Tres arrepadoris (Dr. Drer, Mau e Giuanni), una cantadora solista (Giorgia Loi), su scioberadori de sonus Alex P e su basciu elétricu Frichi. A su progetu pigant parti atrus amigus: chini sonat su pianu, chini sa trumbita, sa ghitarra. Sa truma arregistrat totu, a parti su basciu, e àrtziat a palcu cun-d-una consolle: Alex P dda manixat. Dognunu fait sa parti sua, e dda fait beni, bistu chi custa crica made in Casteddu at bintu cun sa cantzoni Apu biu, su 30 de mesi ‘e ladamini, su Liet International: festival europeu de cantzonis in limba de minoria. Una cunfirma, pustis de àiri bintu, a cabidanni, su Suns: festival de mùsica in is limbas de minoria de Itàlia, Àustria, Svìtzera e Slovénia. Nosu eus pregontau a Micheli Atzori, alias Dr. Drer, unu de is arrepadoris de sa band.

 

– Candu nascit su progetu Dr. Drer e Crc Posse?

 

In s’ierru de su 1991-’92, de una idea mia e de Dr. Radio (Silvestro Ziccardi), chi imoi non sonat prus cun nosu.

 

– De ita chistionant is cantzonis de bosatrus?

 

De sa gherra (Signornò), de is militaris chi ocupant sa terra nosta (Dammi una mano), de su disterru (La luce delle sei), de sa giustìtzia mala (Signor Giuseppe), de s’Ìsula (S.a.r.d.). In generali, nareus, de sa vida nosta…

 

– Su rap – e sa musica – est un’arma bona po denunciai is malis de sa sociedadi?


Segundu nosu eia. Tocat a dda umperai beni, perou… e a cumprendi ca a sparai in ària serbit sceti a fai burdellu…

 

– Seis tra is pagus grupus de oi chi cantant in sardu in Casteddu. Poita?

 

Poita su sardu ddu chistionaus de candu femus pipius e ddu chistionaus oi in dì. Ma sa cosa est cambiendi: trumas noas pagu connotas (mescamenti de arrepadoris, giovuneddus, ma non sceti) funt umperendi casi totus su sardu.

 

– In Casteddu, bogaus is fueddus malus e calencuna strupiadura de fràsia, parti manna de is gióvunus ant abbandonau sa limba nosta.E ita ndi pensais?

 

In Casteddu binti e prus annus fait funt bénnias a bivi famìllias de dónnia parti de Sardigna, e de s’Itàlia puru. Is primas dificilmenti anti pesau is fillus in sardu, ma in domu anti chistionau s’italianu, po timoria de no dd’imparai beni… Fiant giai totus famìllias chi istaiant beni…

Custu est sutzédiu puru in Aristanis, in Crabònia… aici s’est pèrdia puru sa possibilidadi de s’amesturu de su sardu de is biddas cun su casteddaiu. Custa manera de pentzai, po sorti bona, est acabbada. Oi est curiosu a biri ca su casteddaiu ddu intendis raramenti in Casteddu ma s’est spainau in Ceraxus, in Su Masu, poita medas anti móviu foras de Casteddu, ca a si permiti de comporai una domu in Casteddu oi est sceti cosa po genti arrica.

 

– Contasì s’esperiétzia de su Liet International…

 

Esperiéntzia tropu bella. Trumas de musicheris de dónnia logu de s’Europa, grandu atentzioni po sa lìngua e sa curtura nosta, de parti de sa genti e de is istitutzionis. A contai ci nd’est po diis intreas. M’est pràxiu a biri ca su própiu sentidu nostu po sa lìngua, sa curtura e sa terra, ddu tenint gióvunus de sa Carélia, de is Astùrias, de s’Irlanda, de totus cussas terras aundi sa lìngua est de minoria. Sa richesa de s’Europa funt custas curturas. Una cosa apu pentzau: su sardu est pigau in cunsideru prus ingunis chi noi in Sardigna, ca innoi no tenit nimancu su stadu de lìngua uficiali.

 
Chistionaus de custa cantzoni: Apu biu…

 

Custa cantzoni contat de totu su chi teneus ananti de is ogus. Est unu reggae cantau in sardu, e sa melodia sua sighit su giru musicali de Nanneddu meu. E ndi tenit su sentidu puru, in-d-una certa manera…

 

– Cali progetus teneis po crasi?

 

Boleus arregistrai unu discu in beranu. Seus manixendi is ùrtimas cantzonis chi eus fatu e cichendi de ndi fai noas puru. Po s’annu chi benit unu progetu mannu: un’assótziu – o mellus unu cunsórtziu – de totus is grupus sardus chi cantant, cumenti a nosu, in lìngua sarda de chistionis sotzialis e curturalis. Nd’eis a intendi chistionai luegu. E sempri po s’annu nou eus a sighiri sa cosa initziada ocannu cun Tzoku, sa truma siniscolesa nàscia de is ex Kenze Neke. A ponni combat rock cun ragamuffin no est cosa difìcili si su spìritu est su matessi.

 

 

Su Liet

Su 30 de mesi ‘e ladàmini, in Ljouwert, sa capitali de sa Frìsia (Olanda), in su tiatru De Harmonie, c’est stétia sa finali de su Liet International: festival europeu de cantzonis in limbas de minoria. Sa Sardìnia, chi mai iat partecipau, fut rapresentada de Dr. Drer & Crc Posse. In Ljouwert ant sonau atras dexi trumas de musicheris de dónnia logu de s’Europa, chi iant bintu su festival insoru, cumenti Dr. Drer & Crc Posse ant bintu a cabidanni, in su triatu de s’Arti Moderna de Udine, su Suns: festival de mùsica in is limbas de minoria de s’Itàlia, s’Àustria, sa Svìtzera e sa Slovénia. Is finalistas beniant de Astùria, Lapónia, Frìsia, Irlanda, Scótzia, Proventza, Letónia, Berlinu (in rapresentàntzia de sa limba bàsciu-tedesca), Carélia, Friuli.

 

Dr. Drer & Crc Posse ant pigau su primu prémiu de su pùbbricu, gràtzias a sa maioria de is votus de su tiatru e de chini at votau de domu. Su grupu sardu fut acanta de binci puru su primu prémiu de sa crìtiga, ma s’est dépiu acuntentai de su segundu postu, in palas de is SomBy (Lapónia). Cun su prémiu est erribbau finas su cumbidu a partecipai po s’annu chi ’enit a su Befrijdingsfestival Frislân, sa festa de liberatzioni de s’Olanda. S’atòbiu olandesu prus mannu, chi si fait dónnia 5 de màiu in Ljouwert, cun prus de 100 mila personas de pùbbricu. Unu palcu chi at bidu grupus de fama mondiali, euba de italianus, in 20 annus, funt apicaus Roy Paci & Aretuska feti. Custu su giassu: www.befrijdingsfestivalfryslan.nl.