Prosighimus in s’imprenta de sa gara de Thiesi pro Nostra Segnora de Seunis in su 1976 cun tres cantadores campiones: Peppe Sozu, Remundu Piras e Antoni Piredda.
Una bella trina de temas – làgrima, suore e sàmbene – dan sa manera a sos poetas de arrejonare pro pius de un’ora subra custos argumentos, semper presentes in sa vida de sos cristianos. Sun 81 otavas da validoria rara, comente cumbinaia semper cando custos tres cantadores s’abbojan in gara. Cando an cantadu in Thiesi tiu Peppe Sozu teniat 62 annos, tiu Remundu Piras nde deviat cumrpire 73, sa matessi edade de tiu Antoni Piredda chi los aiat cumpridos.
1. SOZU (1’08”)
Initziamos de nou su cantu
in custu nostru verbale conflitu.
In su tema chi isetaimis tantu
dognunu at acampare su diritu:
non bastaiat in palcu su fritu
chi como bi cheriat su piantu
prite devo passare in cuss’istrada
ca a mie m’est sa làgrima tocada.
2. PIRAS (55”)
Tue versas de làgrima un’’utiu
e pianghes ca tenes coro aflitu.
(Ma) Como s’ijerru est bégnidu in s’istiu
e-i su tempus fatende est diritu,
chie suerat cando faghet fritu
podet leare fina unu refriu.
Tando devet giamare su dutore:
a mie m’est tocadu su suore.
3. PIREDDA (53”)
Dies bellas e feas in su mundu,
ndi ‘enit in campagna e in paese.
S’ària ch’est pighende dae fundu
est infrischende sas cambas e pêse.
Tema a poi ‘e su primu e su segundu,
a mie m’est tocadu su ‘e trese.
Po chi sos nostros argumentos giàmbene
tocat a mie a cantare su sàmbene.
4. SOZU (1’08”)
Ormai detzididu ana cun custu,
non podet nemos cambiare ‘idea.
Sa làgrima ‘essit in pena o pelea.
nisciunu podet piangher po gustu
e s’oju chi tenimos in sa chea
cussu devet bistare in issa infustu,
oltres chi ‘essit in dogn’ora trista:
sa làgrima apartenet a sa vista.
5. PIRAS (1’07”)
Eva at fatu su primu pecadu,
e Adamu est su primu pecadore.
. . . . . bìdere a su Criadore
cando l’at Deu goi cundennadu
e po cundenna ischides chi l’at nadu:
“Trabàgliati su pane cun suore”.
Cheret narrer chi a su suore meu
a s’ómine l’at cundennadu Deu.
6. PIREDDA (52”)
Issos si tenen sa cundenna insoro,
l’at decretada s’eternu sovranu
mentres chi deo istimo e adoro
e tenzo caru su sàmbene umanu.
Si osservades su fìsicu umanu:
duas orechietas at su coro
ue totu su sàmbene recuet:
una retzit e una distribbuet.
7. SOZU (59”)
De su serpente a sa tentatzione
Eva pecadu at in cussu momentu.
Adamo puru sa culpa ada tentu,
totas duos pianghen a cumone.
Sa làgrima ‘e s’insoro pentimentu
at generadu sa redentzione.
Da chi est bessida sa làgrima a pizu
Deu promitit ch’imbiat su fizu.
8. PIRAS (52”)
Ma da chi Adamu at dévidu pecare
indonu est si pianghet, su mischinu.
Deu che l’’ogat dae su gialdinu:
li nàrat: “Anda a fora a trabagliare”.
Inie ponet unu cherubbinu
cun ispada ‘e fogu a lu tentare
però Adamu cun su suore sou
s’at piantadu unu gialdinu nou.
9. PIREDDA (51”)
Non lu nego su bene ‘e su suore
nemmancu sa lagrìma naturale.
Ma pensade a su fraternu amore:
s’umanidade fit ruta in su male.
Pensa chi da su primu abbitadore
tenimis su pecadu originale.
E-i custu pecadu originàriu
l’at estintu su samben de Calvàriu.
10. SOZU (59”)
O de una o de àtera manera
non verso mai làgrimas indonu
ca chie mirat s’eternu padronu
altzat sempre sos ojos a s’aera:
si at pecadu dimandat perdonu
tra su piantu e-i sa preghiera.
Ma sa làgrima est s’ùnicu tesoro
chi at dognunu li tocat su coro.
11. PIRAS (53”)
S’ómine a suerare est cundennadu,
suerat ogni umanu pecadore.
E po aer su chelu acuistadu
devet gherrare che trabagliadore
prite su chelu cheret trabagliadu
e si bi andat a foltza ‘e suore.
Chie po trabagliare non s’impitat
cussu mancu su chelu non meritat.
12. PIREDDA (50”)
Deo no ch”eto s’ischeda in biancu,
s’onore a su méritu si dada.
Osservade a Longinu cun s’ispada
cando at a Cristos feltu su fiancu:
a s’ora s’este s’aera iscurada
e-i sa vista li est bénnida mancu
e un’’utiu ‘e sàmbene divinu
fatu at torrare sa vista a Longinu.
13. SOZU (1’01”)
Ma si non bessit sa làgrima a fora
sa religione non tenet valores.
Sas làgrimas non fàghene rumores
ma a Paradisu ch’imbatin dognora.
Poite naran a Nostra Signora
Nostra Signora ‘e sos sete dolores?
Cussu tìtulu si l’at meritadu
po sas làgrimas caldas chi at versadu.
14. PIRAS (52”)
Tue ‘e piangher tenes tropu brama,
su piantu de sei ti est caladu.
però soltantu chie at trabagliadu
de onestade in terra tenet fama.
Santu Zuseppe sempre at sueradu
po campare su fizu e-i sa mama.
Sa mama calchi làgrima l’istrampat
ca b’est Santu Zuseppe chi la campat.
15. PIREDDA (47”)
Bae, Remundu, a trabagliare ognora,
t’at a calare su suore a brou.
E tue ‘e sas lagrìmas daende prou
de sa vista umana s’aurora
ca sas lagrimas de Nostra Signora,
mi’, fini po su caru fizu sou.
E-i s’oju de làgrimas s’at tintu
ca be-i fit su sàmbene custrintu.
16. SOZU (55”)
Lassa a mie chi in làgrimas afoghe
che Marta e Madalena a discunfoltu.
Fin ambas pianghinde a pilu isoltu,
a Gesu Cristu an betadu sa ‘oghe
nende: “Si tue fis bistadu inoghe
Làzaru, frade nostru, non fit moltu.
Cristos cumpresu at sa làgrima pura,
su moltu nd’altzat dae sepoltura.
17. PIRAS (44”)
(Ma) Cristos ‘e sos meràculos est re
e aggiuare li ‘enit de obbligu.
Salvat unu chi andat dae castigu
però cussu dipendet dae me
ca Gesucristu a sa molte ‘e s’amigu
fat’at chentu chilometros a pe’.
Po lu resuscitare ch’est andadu:
nara cantu dêt aer sueradu.
18. PIREDDA (48”)
Però non bastat su suore solu
e nemmancu sa làgrima gemella.
Ma chie aggiunghet sas notes de dolu
a tota custa intera parentella?
Mira in Torinu ch’in-d-una capella
bi est de Gesu Cristu su lentolu.
E in su lentolu chi est in Torinu
cunservadu est su sàmbene divinu.
19. SOZU (1’00”)
Chelzo chi suerende andes e torres
ma cun Làzaru meda non ti onoro
ca tocat chi in sas làgrimas ti aforres
si bramas de sa grascia su tesoro:
incue su piantu ‘e ambas sorres
a Gesu Cristu at tocadu su coro.
Ca fit moltu e postu intr’’e sa cascia
da sa lagrìma an otentu sa grascia.
20. PIRAS (56”)
Abbaidade su fizu ‘e Deu
cando cunsagrat s’ecuaristia:
leadu at issu samben e binu ebbia
e lu dat a sos Apòstolos a torneu.
Narat: “ Su pane est sa carre mia
e-i su ‘inu est su sàmbene meu”.
Cuss’Ecuaristia su Segnore
l’at fata da su frutu ‘e su suore.
21. PIREDDA (43”)
Da s’argumentu non che ‘esso addane
antzis devo risponder a vicinu.
Tzeltu chie trabagliat su terrinu
nd’at a sufrire peus de su cane.
As a tenner reione po su pane
ma non ti do reione po su ‘inu
puite at nadu su fizu ‘e Deu:
“Lêzi, bufade su sàmbene meu”.
22.SOZU (1’04”)
De suore e de sàmbene in su cantu
no azis a pesare un’avolotu.
Ma da chi a Cristos de sa pena afrantu
de ebreos fin bochinde unu fiotu
Pedru jurat chi mai l’at connotu
ma poi s’est pentidu e at piantu.
Da sa làgrima sua ‘e pentimentu
fina ‘e su chelu sas giaes at tentu.
23. PIRAS (44”)
Antoni, non ti ch’andes tropu addane,
para coraggiu e beninde a vicinu.
Ammentadinde chi Cristos divinu
binu e pane cunsagrat iguddane:
sa carre l’assimizat a su pane
su samben l’assimizat a su ‘inu.
Su ‘inu meu a tentu sa vitória
e ch’est bandadu a sa janna ’e sa glória.
24. PIREDDA (47”)
Non nd’isco a ue cheres arrivare:
Iscùltami, Remundu, cun passéntzia.
Tando ‘e sa Divina Onnipoténtzia
non nde devimos mancu cummentare:
da chi si tratat de l’assimizare
b’at de sa realtade diferéntzia.
L’at dadu de su ’inu s’assimizu
ma su samben de sas venas est fizu.
25. SOZU (54”)
Ma ammentade una fémina terrena,
de libbertina dat proa palese.
Ma a da poi su re de sos rese
a connoschéntzia ‘enit de s’iscena:
pianghinde Maria Madalena
de Gesucristu si est betada a pêse.
E si traformat de sana pianta:
l’at perdonada e diventada est santa.
26. PIRAS (43”)
(Beh) A Antoni li rispondo dae nou
po cantu chi si nd’est pesadu reu.
Su satzerdote est ministru ‘e Deu
e faghet sa cosa cun fide e a prou.
In su càlighe b’est su ‘inu meu
però bi mancat su sàmbene tou.
Su ‘inu meu in sa missa ‘ider dêse:
deo bi so e tue non bi sese.
27. PIREDDA (44”)
Ma de fronte a Deu giustifica,
faghes una figura miserina.
Su sàmbene at sa parte pius rica
de s’universu in dogni faina.
E cale eroe che Pietro Mica
cando atacadu at su fogu a sa mina?
Su sàmbene at ispaltu in s’orizonte:
salvat Torinu e-i su Piemonte.
28. SOZU (50”)
A Bàrbara, innotzente verginella,
ammentadinde flagellada l’ana
ca at giuradu sa fide cristiana,
nd’at fatu ‘e sa presone una capella
ma ca su note at piantu in sa cella
l’est aparidu Cristos e l’at sana.
S’àteru die in pùbblicu est bessida
e non giughiat manc’una ferida.
29. PIRAS (43”)
Tue as a Madalena postu a misciu,
at piantu che fémina terrena.
S’aiat trabagliadu Madalena
no aiat leadu cussu visciu:
ca non sueraiat sa carena
példidu at onestade cun giudisciu
proite chie onestu istare cheret
bisonzu chi trabagliet e sueret.
30. PIREDDA (41”)
O Remundu, non fetas s’ispavaldu
ca ancora sa finale non l’as bida.
e mancu Sotgiu che poeta saldu
non ti l’’antes gasie penetida.
Finas ch’at tentu su sàmbene caldu
s’est finas Madalena diveltida
e at pensadu a su chelu infinitu
da chi jughiat su sàmbene fritu.
31. SOZU (53”)
De una cosa, Piredda, ti ammenta:
Madalena est de lughe un’aurora
ca sas làgrimas ch’at bogadu a fora
s’ànima sua la torran cuntenta:
dae su samben tou est pecadora
ma sa làgrima mia l’at redenta.
E tando in su chi pensas non be-i creo:
s’’idet chi santa l’apo fata deo.
32. PIRAS (43”)
A Madalena Peppe dat su ‘antu
e Antoni l’at abbasciada in pitzinnia.
Sant’Isidoro, invece fatu santu
ja l’ana prite at sueradu ebbia:
no at versadu sàmbene ne piantu,
fut aradore e in sa massaria.
Ca su trabagliu est sempre beneitu
su suore l’at dadu su meritu.
33. PIREDDA (40”)
Remundu pensat a s’agricoltura
tantu non tenet àtera grandesa.
Peppe po Madalena tene cura,
mi paret tue l’as male cumpresa
ca si est diveltida in gioventura
e si est penetida a sa ‘etzesa.
Totucantu su sàmbene meritat:
isse t’iscaldit e isse t’infrìtat.
34. SOZU (57”)
Bella e giovàna fit a meraviglia
cand’issa reparadu ada sos dannos.
Tue posta l’aias in afannos
ma poi b’intro deo po puntiglia:
poi ‘e su perdonu po trint’annos
piantu at in sa gruta ‘e Marsiglia.
E si la miras sa làgrima onoras
ca l’at fatu in sos càvanos sas coras.
35. PIRAS (40’’)
Peppe, tenes sa parte tropu rude
e non li podes fagher sa difesa.
Madalena at peldidu sa virtude
cand’aiat su sàmbene in caldesa:
da chi no at sueradu in gioventude
a s’ora at piantu a sa ‘etzesa.
S’aiat sueradu che a mie
no aiat piantu che a tie.
36. PIREDDA (45”)
Lassade ‘e Madalena sa piae,
sighimus a cantare in su binàriu.
Tochende inoghe e tochende iguddae
est sempre sa dotrina ‘e su rosàriu:
issara as nadu, a su primu vicàriu
chi de su chelu li an dadu sa jae
ma de fronte a Thiesi totucantu
chie at a Santu Pedru fatu santu?
37. SOZU (53”)
Remundu Pira, pedinde agiutóriu
non lu so deo in-d-unu tema a bantu
ca si devo piangher est notóriu
devo versare ‘e làgrimas su tantu:
nara poite est ch’a su Purgadóriu
lu jàmana su regnu ‘e su piantu.
Est sa làgrima chi ti purifìcat
chi de su chelu sa via t’indicat.
38. PIRAS (39”)
Bisonzu chi ‘e sa làgrimas mi joghe,
ca est unu banale repertóriu.
S’ómine de suore at una foghe
po produire po totu est notóriu.
Tue ti ch’andas a su Purgadóriu
ma deo devo suerare inoghe.
Non mi che poto andare addane-addane
ca sa zente ‘e inoghe cheret pane.
39. PIREDDA (46”)
Abbarra, Peppe Sozu, a su fiancu
e dae a sa rejone atentzione.
Cand’est tropu su gróbbulu biancu
est in deperimentu sa persone
e a chie jughet de sàmbene in mancu
tando li faghen sa trasfusione.
Po nde l’’ogare sa vena si punghet
e a chie nde mancat si nd’aggiunghet.
40. SOZU (55”)
Ma non so deo andende a tota fua
po ch’arrivire a su regnu ‘e s’altura.
Si piango sa via non mi est dura,
podet bistare a fiancu ‘e sa tua.
A da chi naschet una criadura
su piantu est sa prima ‘oghe sua.
‘Essit sa làgrima innotzente e pulida
chi est su primu signu ‘e sa vida.
41. PIRAS (49”)
(Ma) Sa criatura ‘e piangher intendet
e abbozat su piantu e li resessit
però a piangher issa non petessit
ca su coro po nudda si atzendet.
Cussa pianghet però non cumprendet,
infati mancu làgrimas non bessit.
Parte tua no est ne parte mia
ca tue tenes sa làgrima ebbia.
42. PIREDDA (46”)
O Peppe, non ti fetas furibbundu,
a su chi ses nelzende pone cura.
Totu cantos naschimos po natura
e-i su frutu ‘enit dae su fundu:
ischit pianghet una criatura
ma poi chi est bénnida a su mundu
Ma noe meses primu ‘e esser nada
in su sàmbene est ingenerada.
43. SOZU (53”)
Ma su piantu est in sa parte mia
e non b’insistas in su toltu ancora
ca una criadura a s’aurora
da chi pianghet est signu chi est bia
e poi a su momentu ‘e s’agonia
sa làgrima nd’ispuntat torra a fora.
Mai nisciunu de issa si brivat,
s’ùltima paltit e sa prima arrivat.
44. PIRAS (44”)
Mirade, a pena nàschen sos piseddos
mama e babbu ‘e immannare isperat.
Sa mama faghet fascas e manteddos
e istìrada e cosit e suerat,
su babbu est furriende sos chelveddos:
trabagliat, sacrificat e chimerat.
Chie li dat sas gràtzias de Deu
est solamente su suore meu.
45. PIREDDA (48”)
Abbarra calmu e faedda pianu,
non che la finas cun pane e regotu.
Ma sos ch’an sacrifitzios connotu:
ch’ana versadu su sàmbene umanu
e Santu Zuniari e Santu Brotu,
e-i santu ‘Ainzu, turritanu
oe los sunu santos venerende,
niunu los at bidos pianghende.
46. SOZU (52”)
Ma si de una cosa ti fentomo,
ca non mi das allìviu a sa pena,
e canta gioventude, nara como,
ponet a su bersagliu sa carena:
su fizu est suerende in terra anzena
e-i sa mama est pianghinde in domo.
Proa da custa pena a che la frànghere,
tue impedi sa mama ‘e piànghere.
47. PIRAS (46”)
Su piantu lu adata e lu concìlia,
non chelzo chi lu sàmunes in Omo.
Si cojuan sos gióvanos de como,
si deven costituire una famìlia,
si deven comporare sa mobbìlia,
si deven puru fagher una domo.
A manera in futuru chi prospèret
unu pagu ‘e suore be-i cheret.
48. PIREDDA (44”)
Bonu proe ti fetat bonu proe,
bae a bender móbbiles e oro
per’a Thiesi domandamus oe
inue est s’eroismu e su decoro:
medagliadu tenimus un’eroe
e-d-est su fizu de sa terra insoro.
Su sàmbene l’at dadu cussu ‘antu,
e non l’at fatu eroe su piantu.
49. SOZU (51”)
Piras at faeddadu de s’unione,
ma li cheria narrer una cosa.
Bi at fina una folla numerosa,
sa die festa faghen a cumone
però sa mama a una fiza isposa
li dat in domo sa benediscione.
Sun duos coro de amore in gherra:
sas làgrimas nde falan fina a terra.
50. PIRAS (49”)
Cando duos . . . . . . . s’unione
sa mama e-i su babbu at un’obbrigu.
Po usu ‘e una manna traditzione
chi l’an usadu da tempus antigu,
cando li dat sa beneditzione
ja lis betan sos punzos de su trigu.
Su trigu subra ‘e totos duos est rutu
e cussu trigu de suore est su frutu
51. PIREDDA (44”)
Si lis betas su trigu a manu lena
prite lu faghes nàrami e atua.
Si in su coro la tenes a sa cua
in issa b’este s’amore piena:
das sa beneiscione a fiza tua
chi non la das a una fiza anzena.
Nàralu ‘e custu pópulu a preséntzia
puite est chi b’est cussa diferéntzia.
52. SOZU (51”)
Ma si bi rifletides unu pagu
da chi semus in tres in custu tretu
separamos su brutu dae su netu
nessi po tres minutos de disvagu:
su suore a sas boltas dat fiagu
e podet esser su sàmbene infetu.
Sa làgrima est sa sacra parte eleta
sempre incontaminada e sempre neta.
53. PIRAS (40”)
(Be) Peppe, chie at unu brutu odore
cando est sueradu una persone,
però cussu fiagu est un’onore
cando passat suerende su lentore:
chie non tenet fiagu ‘e suore
cheret narrer ch’est unu pelandrone
chi no at mai sueradu igue
cussos guasi sun coment’e tue.
54. PIREDDA (51”)
Si Peppe Sozu aintrat un’istillu
fatende a sos collegas un’isfida.
Si b’est sa parte mia aggradessida
ja vives finas tue trancuillu.
As nadu chi sa làgrima est pulida,
mìradi tando unu cocodrillu:
isse pianghet, fàghemi a ischire,
ca non podet sos mossos digerire.
55. SOZU (50”)
Non l’apo fatu po pesare briga
ma pro . . . . sa zente tota.
Como non torro a giampare sa riga
ma la sigo ‘e sa làgrima sa lota:
nara poite in d-una tumba antiga
bi at un’anforeta ‘e terra cota
ca totucantu in onore ‘e su moltu
sas làgrimas inie ana regoltu.
56. PIRAS (49”)
Ma como non si usat in sa trumba
atediare de s’oju su lentore,
invece oe trabagliat s’iscultore
isculpit in sa rosa una columba.
Un’Anghelu b’isculpit protetore
isfidende sos mostros de sa tumba
pro ch’anden a su giudisciu ‘e Deu
e tot’est frutu ‘e su suore meu.
57. PIREDDA (45”)
A lu lassas, Remundu, su buldellu
chi non piaghet tantu a suerare,
ma su sàmbene at àteru livellu:
non si podet niunu allontanare.
Sun sos dutores fatende s’apellu
chi totus potan sàmbene donare
però non chìlcana unu donatore
chi diat sa lagrima o su suore.
58.SOZU (52’’)
De Remundu sos ànghelos e trumbas
mi fàghene cantende simpatia
ma s’a-i custa zona ti che arrumbas
permiti ch’eo ti nelza sa mia.
Su duos de su mese ‘e sant’Andria
totus faghen sos giros in sas tumbas:
totus pianghen sos mortos insoro
e sos chi non pianghen no an coro.
59. PIRAS (53”)
(Be) Su die est s’ammentu ‘e sos dolores,
oe pianghen sos mortos de deris.
Sos bechinos diventan totu amores
ca faghen piatzolas chi preferis,
e poi che lis giughen sos fiores
ch’est su suore de sos gialdineris.
Fina infunden de làgrimas su pe’
ma sos fiores los lean dae me.
60. PIREDDA (49”)
Canta matana e cant’abbolotu
custu suore po dare in omaggiu,
però si nos ponimos in viaggiu
nos devimos iscapellare totu.
Nara, sa tumba ‘e su Milite Ignotu
cantos bi nd’andat in pellegrinaggiu.
Presentan in-d-un’ùnica persone
su sàmbene ‘e s’intera natzione.
61. SOZU (59”)
Piredda, ja l’indovinas s’istrada
in-d-una tumba ‘e marmu o de cristallu.
Ma s’a inie faghes sa tucada
non cantas che picione o papagallu
e ne li faghes una serenada
ne b’andas po ti fagher unu ballu.
Si cuss’eroe cheres onorare
bi deves una làgrima versare.
62. PIRAS (51”)
Nara, una doda si bi faghet sola?
No, b’an betadu linu e lana susu
poi ja devet ballare su fusu
su ghìndalu girare cun s’atzola
in su telalzu istirare s’ispola,
bi devet aer cosas de piusu.
Est su suore su chi sodisfaghet
ca chena issu doda non si faghet.
63. PIREDDA (51”)
Peppe faeddas de su sentimentu
prite tenes sa làgrima odierna.
Ma lea ‘e sa rejone sa lanterna,
de cantu sacrefìtziu ada tentu.
A su Mìlite in sa tzitade eterna
l’an fatu un’onoradu monumentu
prite at versadu su sàmbene sou:
non b’intrat nudda su piantu tou.
64. SOZU (59”)
Ma de patriotismu sas iscossas
non las cheria ponner in guai.
Si totu cussa glória ti addossas
prite sàmbene as versadu assai
nàrami a sas Ardeatinas Fossas
si tue non bi ses bintradu mai.
Proa a bi passare calchi die
de cantas làgrimas bi versan inie.
65. PIRAS (57’’)
Nàdemi, Michelangelo e Bramante
cantu suore ‘e mente e de ischina
po fagher cussa cùpola importante
de Santu Pedru e de sa dotrina.
Cantu dêt aer sueradu Dante
po fagher sa Cummédia Divina:
immaginada a l’àere e finida
b’at postu su suore ‘e tota vida.
66. PIREDDA (46”)
Deo non chilco a Dante fiorentinu
tantu non b’intrat ne bene ne male.
Ma chie at su coro leoninu
su sàmbene lu versat puntuale:
ite nd’amus a narrer de Musinu,
de Thiesi su grande generale?
Sàmbene nd’at versadu goi e gai
ma pianghende non l’an bidu mai.
67. SOZU (56”)
Faghe a sos paesanos richiamu
ca a custa terra tua an fatu onore.
Ma deo devo sighire unu ramu
chi non tocat ne samben ne suore:
da chi at piantu su ‘etzu Priàmu
l’an torradu sa salma de Ettòre.
S’inimigu cummovet un’aizu
finas a puntu e li torran su fizu.
68. PIRAS (48”)
…………………..vitamina,
e contr’a Peppe la gherrat e tessit.
Tando su sàmbene andat in ruina,
solu-solu a sanare non resessit:
tando li dana nessi un’aspirina,
in su suore su male chi ‘essit
. . . . . . tota sa dimora
e-i su …… ch’’essit fora.
69. PIREDDA (48”)
Bae Remundu, trabaglia e suera,
dadu chi t’est tocadu su suore.
Ossérvati a fratelli Bandiera,
cantu sàmbene umanu est in dolore
e sos màrtires de su Belfiore
po redimire s’Italia intera.
De su sàmbene est tota sa siéntzia
in sos eroes de s’Indipendéntzia.
70. SOZU (59”)
Chircas d’eroes una parentella
ch’an versadu su sàmbene a trainu.
Ma ti lea sa nostra ìsola bella,
cantos males la ponen in pedinu,
bae e che passa in domo de Mazzella,
de Ceselia, Mannatzu e Baghinu
chi sos costrintos mancan dae ora
ma sun in domo pianghinde ancora.
71. PIRAS (45”)
Peppe si ponet sa manu in su fronte,
(ma) persone molta non la torrat bia.
Po fagher unu ramu ‘e ferrovia
bi chelzo deo a bucare su monte:
b’at unu riu a si ponner in via,
tando suero e bi fato unu ponte.
Bois pasades ambos in piata
ma su suore meu bos l’at fata.
72. PIREDDA (46”)
Remundu est reunende ratatuglia,
po fagher gallerias a ispantu.
Ma su sambène no est una buglia,
po lu versare bi cheret su tantu.
Bae, Remundu Pira, a Redipuglia
inue b’est su grande campusantu:
de s’Itàlia intera su decoro
sos ch’an versadu su sàmbene insoro.
73. SOZU (58”)
Incue puru làgrimas in penas
bidu an era lontana che vicina.
Ma su piantu est una meighina
ch’isfogat da su sàmbene in sas venas:
si cheres bider de piantu iscenas
oe ti podes aviare in Cina
chi bi versan sas làgrimas a riu
ca at su capu insoro nadu adiu.
74. PIRAS (47”)
Mao a mie m’at fatu pagu dolu
tantu non l’apo po nudda piantu.
Si fato fagher unu campusantu
bi cheret de suore su consolu,
e poi su suore nd’’essit solu,
su sàmbene in sas venas si ch’est frantu:
non nd’’essit ca sa pedde at po ammuntu
e po nd”essire a foras cheret puntu.
75. PIREDDA (48”)
Su sàmbene totue est veneradu
da sa trincea fina a sa capella.
In difesa ‘e s’Itàlia bella
nàrami cantu sàmbene an versadu.
Enrico Toti leat s’istampella
da chi l’an de un’anca mutiladu.
Su sàmbene at versadu cun caràtere:
fin’a un’anca tucat a cumbàtere.
76. SOZU (1’02”)
Però in Mao non tenia toltu,
si l’apo presentadu in custu tretu.
Non fit isse ‘e sa làgrima in s’isetu
ma lu sun pianghinde a pilu isoltu:
sa làgrima chi si versat po su moltu
ja li confirmat de vida s’afetu.
Dae s’oju una làgrima nde illustran
totu s’amore insoro a s’ora mustran.
77. PIRAS (1’08”)
Si unu giru in sa Saldigna faghes,
b’at nuraghes de tufu e de granitu.
Bandade a sas piramides d’Egitu,
de civiltade antiga sos tenaghes:
si gratacielos e casteddos faghes
o digas ‘e su riu in calchi situ:
naves, e bastimentos e frigatas
totu cun su suore las an fatas.
78. PIREDDA (52”)
Naras chi asa fatu pane ‘e trigu,
dogni fadiga e dogni cereale.
Amsìcora, unu saldu eroe antigu,
at lassadu una fama universale:
po non ruer in manu a s’inimigu
s’at ficadu in su coro su pugnale.
Su sàmbene ite glória li prestat:
s’eroe morit ma sa fama restat.
79. SOZU (1’02”)
Mi parit ora ‘e fagher chiusura,
ma fino in sos momentos dolorosos
poite che at eventos disastrosos,
de su Friùli mira s’isventura.
Bìndighi milliones de lebbrosos
sun isetende assisténtzia e cura.
Cando mai su mundu totucantu
chi no iscultat s’insoro piantu.
80. PIRAS (46”)
Ja chi su tema cheren a finire,
finimus de acordu tot’umpare.
Su Frìuli est de ricostruire
sas domos che in primu po torrare
e po cussu si devet suerare,
a trabagliare non deven timire.
No be-i cheret su piantu tou:
su suore la faghet dae nou.
81. PIREDDA (51”)
Fato sa fine si sa fine pones,
no arroganto e ne arrogantas.
Però, Remundu, su suore ‘antas
ma in su samben sun sos campiones
puite degheoto milliones
sun màrtires tra santos cun sas santas.
Sacrificadu an sa vida po Deu
e an versadu su sàmbene meu.