Tzertos, pro sa campagna eletorale,

si servin de sa sólita impostura:

o su perìgulu ’e sa ditadura,

o regimes de tipu orïentale.

 

 

Ma sos italianos -mancu male-

sun negados a sìmile aventura.

Sun isportivos e an pius cura

de su campïonadu mondïale.

 

 

Bastat pensare a su golpe-Borghese,

chi fit perfetamente organizadu,

cun zent’armada da-e conca a pêse.

 

 

Unu segnale fin tot’isetende,

prontos a fagher su colpu ’e Istadu,

ma est faddidu ca fit pïoende.

 

 

Su ’e timire est calchi fanfarrone

chi no est ne golpista e ne armadu

però diventat ministru ladrone.