Ca su Consizu ’e sa nostra Regione
at iscobertu s’invalidade,
de consizeris già sa meidade
propensa a s’indennizu est cun rejone.
Bisonzat ch’apat su coro ’e leone
chie de issos no at piedade
ca meritat un’alta indennidade
s’infortunadu in cussa mansione.
Pro su bene ’e su pópulu arriscados
si fin in cussa bolgia regionale,
forsi regularmente assegurados.
Ma como sa ’etzesa passan male,
in coro o in cherveddu invalidados,
si sa pretesa issoro est illegale.
Ma cando in su Palatu b’at toroju
dogni reatu diventat legale:
corvu cun corvu no si nd’’ogan s’oju.