Est su professori Giuanni Lilliu, archeologu famau in totu su mundu, su primu “Sardus Pater” premiau de sa Regioni Sarda.

 

Su 20 de Mesi ‘e Idas, su presidenti de sa giunta regionali, Arrenatu Soru, dd’at donau sa patena chi, de ocannu, sa Regioni intregat a is sardus chi ant rendiu onori a sa terra insoru in totu su mundu.

 

Po festai paris a su professori, in s’aposentu mannu de sa domu regionali, furint presentis totu is assessoris, su presidenti de su Consillu, Giagu Spissu, professoris de s’universidadi de Casteddu e de Tathari.

 

“Est sa prima borta chi donaus custu premiu – at nau Arrenatu Soru chistionendu in limba– est beniu facili meda a pensai a fusteti. Sardus Pater – at sighiu su presidenti de sa Regioni – est su nòmini de un’istatueta nuragica e duncas a-i cussa figura fusteti ddi donat fortza, vida e ànima. A nòmini de sa Giunta, de su Consillu e de totu su populu sardu, nosu ddi donaus custa prima onorificentzia po su chi at fatu po sa storia nosta, po s’identidadi, po sa lingua e po comenti nos at fatu prus arricus de connoscientzia e de sentìdus. Fusteti est acadèmicu dei Lincei, at iscobertu su nuraxi de Barumini, at fatu totu su chi at fatu. In cancua manera rapresentat su disillu de totu is sardus de bolliri cumprendiri su chi funt e su chi iant bolli’ essiri”.

 

Bellus fueddus, a is calis funt sighius cussus de su presidenti de su Consillu Regionali Giagu Spissu e de Erricu Atzeni, archeolugu issu puru, chi at fueddau a nomini de totu is scientis de Giuanni Lilliu. “Torraus gratzias a su maistu po su chi nos at imparau – at nau Atzeni – po sa letzioni morali e culturali chi professor Lilliu at istrinau a sa Sardigna intrea in totu sa vida sua”.

 

Una bella dì po Giuanni Lilliu. Ddi luxiant is ogus po s’emotzioni. “ Po mei custu est un’onori mannu – at nau su professori – in sa vida mia apu trabballau po donai spetu bonu a sa terra nosta in su tempus benidori, po dda ponniri in relata cun is atras natzionis. Apu cicau de ammostai a totu su mundu sa cultura manna de sa Sardigna, po donai valori a sa sienda chena assimbillu chi nos ant lassau is babbus nostus. Creu de no airi trabballau po debbadas: is sardus oi connoscint s’istoria insoru e scint ca si podint ponniri a cunfrontu cun is atrus populus de su mundu”.

 

De fatu Lilliu at chistionau finas e de is patimentus chi est sunfrendu sa terra nosta: “Sa classi politica sarda oi prus de eriseru depit amparai is valoris de s’autonomia – at nau Lilliu – Deu apu cicau de cumbattiri po chi is sardus no fessint tzeracus, est ora chi is politicus acabbint de certai. Fortza paris !”.

 

Sa Regioni Sarda at a torrai a imprentai is operas de Giuanni Lilliu. Is iscritus ant essiri arregortus in sesi libbrus. Ma sa giunta regionali no si frimmat innoi. Arrenatu Soru at detzidiu de donai unu milioni de euro a is universidadis sardas po su studiu e sa catalogatzioni de totu su materiali de sa tzivilidadi nuragica bogau a pillu de is archeolugus.

 

 

 

Scheda Giovanni Lilliu

 

Giuanni Lilliu est nasciu in Barumini su 13 de Martzu del su 1914. Cun is istudius e is sgavus at fatu connosciri sa tzivilidadi nuragica in totu su mondu. Est issu chi nd’at torrau a bogai a pillu, in is annus ’50, su nuraxi de Barumini, monumentu chi s’Unesco at postu in sa lista de sa sienda manna de s’umanidadi. In in annus ’60 e ’70 at isgavau finas e in Malta, in Corsica, e in is isulas Balearis.

 

S’est laureau in Roma, ania st istudiau cun Ugo Rellini,  in sa Scola Archeologica. De su 1943 a su 1955 at trabballau in sa Soprintendentzia de is Antighidadis de sa Sardigna. Est issu chi at fatu nasciri sa Scola de Spetzializatzioni de Istudius Sardus in s’Universidadi de Casteddu. Po bint’annus at fatu su Presidi de sa Facoltadi de Lettere e Filosofia. De su 1990 est in s’Accademia dei Lincei.

 

In sa carriera de Giuanni Lilliu ddu est finas e un’esperientzia politica: de su 1969 a  1974 è istetiu consilleri regionali po sa Democratzia Cristiana.

 

Funt medas is operas suas intregadas a sa cultura, a sa storia e a s’identidadi de is sardus. In mesu de custas:: “La civiltà dei sardi dal neolitico all’età dei nuraghi”, Torino, 1963; “Sculture della Sardegna nuragica”, Casteddu, 1966; “La civiltà nuragica”, Sassari, 1982; “Cultura e culture”, Sassari, 1995; “Arte e religione della Sardegna prenuragica”, Sassari, 1999, “Le Ragioni dell’Autonomia”, Casteddu 2002, “Sentidu de libbertade”, Cagliari, 2004.